வரைக்காட்சிப் படலம் - 948

948.

சுந்தர வான மாதர்
   துவர் இதழ்ப் பவள வாயும்.
அந்தம்இல் சுரும்பும். தேனும்.
   மிஞிறும் உண்டு - அல்குல் விற்கும்
பைந் தொடி மகளிர். ‘கைத்து ஓர்
   பசை இல்லை’ என்ன விட்ட
மைந்தரின் - நீத்த தீம் தேன்
   வள்ளங்கள் பலவும் கண்டார்.
 
அல்குல்     விற்கும்  -  (தம்)  அல்குலை  விலைக்கு விற்கின்ற;
பைந்தொடி  மகளிர்  -  பசும்  பொன்னாலாகிய  தொடிகள் அணிந்த
விலை  மகளிர்;  ஓர் பசை இல்லை -  (செல்வமெல்லாம் பறித்த பின்)
கையிலே சிறிதும் பயனில்லை; என்ன -  என்று கருதி; கைத்துவிட்ட -
வெறுத்துக்  கைவிடப்பட்ட; மைந்தரின் -  ஆண்களைப் போல; சுந்தர
வான  மாதர் - அழகிய தெய்வப் பெண்களின்; துவர் இதழ் - சிவந்த
இதழோடு;  பவள  வாயும் - கூடிய பவளம்  போன்ற வாயும்; அந்தம்
இல் சுரும்பும் - வரம்பு இல்லாத சுரும்பும்; தேன் மிஞிறும் - தேனும்
மிஞிறும்  ஆகிய வண்டினங்களும்; உண்டு  நீத்த - பருகிக் கைவிட்ட;
தீந்தேன்   வள்ளங்கள்  பலவும்   -  இனிய  மதுக்  கிண்ணங்கள்
பலவற்றையும்; கண்டார் - பார்த்தார்கள். 

தெய்வப்  பெண்களின் வாயும்.  சுரும்பும். தேனும். மிஞிறும் குடித்து
நீத்த   வெற்று   வள்ளங்களை   அங்குள்ளவர்   பார்த்தார்கள்.  வீசி
எறியப்பட்ட      மதுக்கிண்ணங்களுக்குக்      கையில்      பொருள்
உள்ளவரையிலும்    தம்மிடம்    வைத்துக்   கொண்டு   அவர்களிடம்
பொருளில்லாதபோது   விலைமகளிரால்   கைவிடப்படும்    மைந்தரை
உவமை கூறினார் - உவமையணி.                              21