மிதிலைக் காட்சிப் படலம் - 606

606.

நிழல் இடு குண்டலம்
   அதனின். நெய் இடா.
அழல் இடா. மிளிர்ந்திடும்
   அயில் கொள் கண்ணினாள்.
சுழலிடு கூந்தலும்
   துகிலும் சோர்தர.
தழல் இடு வல்லியே
   போல. சாம்பினாள்.
 
நிழல்   இடு -   ஒளி   வீசுகின்ற;  குண்டலம்   அதனின் -
காதணியான  குண்டலம்   வரை   சென்று;  நெய்  இடா  - நெய்
தடவப் பெறாமலும்;  அழல்   இடா   -   நெருப்பிலே  வைத்துக்
காய்ச்சப்  பெறாமலும்;  மிளிர்ந்திடும்  அயில்கொள் -  விளங்கும்
வேல் போன்ற; கண்ணினாள் -  விழிகளையுடைய  சீதை;  சுழலிடு
கூந்தலும் - கடை குழன்ற தன் கூந்தலும்;  துகிலும்  சோர்தர  -
உடையும்   நெகிழும்படி;   தழல்இடு  -  நெருப்பிலே    போட்ட;
வல்லியே போல  -  பூங்கொடி  போல; சாம்பினாள் - வாடினான்.  

நெய்     இடா அழல் இடா மிளிர்ந்திடும்  அயில்: இல்பொருள்.
உவமை.  சுழல்  இடு  கூந்தல்: பனிச்சை. சீதை நினைப்பு மிகுதியால்
உடற்சோர்வுற்று மிக வருந்தினாள்.                          43