எழுச்சிப் படலம் - 872

மகளிரைக் கண்டு ஆடவர் அகலுதல்

மகளிர்க்கு வழிவிட்டு ஆடவர் விலகுதல்
 
872.    

முருக்கு இதழ் முத்த மூரல்
   முறுவலார் முகங்கள் என்னும்
திருக் கிளர் கமலப் போதில்
   தீட்டின கிடந்த கூர் வாள்.
‘நெருக்கு இடை அறுக்கும்; நீவிர்
   நீங்குமின் நீங்கும்’ என்று என்று.
அருக்கனில் ஒளிரும் மேனி
   ஆடவர் அகலப் போவார்.
 
முருக்கு     இதழ்  -  கல்யாண  முருங்கைப்  பூவைப்  போன்ற
உதட்டையும்;   முத்தம்  மூரல்  -  முத்துப்  போன்ற  பற்களையும்;
முறுவலார்  -  புன்சிரிப்பையும் உடைய மகளிர்; முகங்கள் என்னும்-
(தம்முடைய)  முகங்கள்  என்கின்ற;  திருக்  கிளர் கமலப் போதில்-
அழகுமிக்க  தாமரைப்  பூவில்;  தீட்டின  கிடந்த  - தீட்டியனவாய்க்
கிடந்த;  கூர்வாள் - கூரிய வாட் படைகள் (கண்கள்); நெருக்கு- நாம்
நெருங்கியுள்ளதை;  இடை  அறுக்கும்  - ஊடுருவிச் சென்று நீக்கும்;
நீங்கள் - (ஆதலால்.  ஆடவரே)  நீங்கள்;  நீங்குமின்  நீங்கும்  -
விலங்குகள்  விலகுங்கள்;  என்று  என்று  -  என்று  தெரிவித்தபடி;
அருக்கனில்   ஒளிரும்  மேனி  - கதிரவனைப்  போல்  விளங்கும்
உடம்பைப் படைத்த; ஆடவர்  -  ஆண்கள்;  அகலப்  போவார் -
வழிவிட்டுச் செல்வார்.

நெருங்கிச்     செல்லும் ஆடவர் மகளிர் கூட்டத்தைக் கண்டு நாம்
நெருக்கிச்  சென்றால்  தீட்டிக்  கிடக்கின்ற  வாள்கள்   அறுத்துவிடும்.
விலகுங்கள்.   விலகுங்கள்  என்று  சொல்லிக்  கொண்டே   விலகினர்
என்பது.

நீங்குமின்  நீங்கும் -  அடுக்கு.  விரைவுப்  பொருளது - மின். உம்
என்ற இரண்டும் ஏவல் பன்மை விகுதிகள்.                      56