எழுச்சிப் படலம் - 861

மகளிர் கூட்டம் செல்லுதல்

861.    

நுண் சிலம்பி வலந்தன நுண் துகில்.
கள் சிலம்பு கருங் குழலார் குழு
உள் சிலம்பு சிலம்ப ஒதுங்கலால்.
புள் சிலம்பிடு பொய்கையும் போன்றதே.
 
நுண்     சிலம்பி- சிறிய சிலந்திப் பூச்சி; வலந்தன -  பின்னியது
போன்ற; நுண் துகில் - மெல்லிய ஆடைகளையணிந்த; கள் சிலம்பு -
வண்டுகள்   (மொய்த்து)   ஒலிக்கின்ற;   கருங்   குழலார்  -  கரிய
கூந்தலையுடைய  மகளிரின்;  குழு - கூட்டம்; சிலம்பு உள் சிலம்ப -
(அடிகளில்  பூண்ட)  சிலம்புகள்  உள்ளே  உள்ள  பரல்கள்   ஒலிக்க;
ஒதுங்கலால் -  நடந்து  செல்வதால்;  புள்  சிலம்பிடு  -  பறவைகள்
ஒலிக்கின்ற; பொய்கையும் - தடாகத்தையும்; போன்றது - ஒத்தது.

மெல்லிய  ஆடையணிந்த மகளிர் கூட்டம் அலைபரந்த நீரையுடைய
பொய்கைக்கு     ஒப்பாயிற்று.     அவர்தம்    காற்     சிலம்பொலி
பொய்கையிலுள்ள அன்னப் பறவைகளின் ஒலிக்கு ஒத்தாயிற்று.      45