உண்டாட்டுப் படலம் - 1068

மாதொருத்தி மதுவுண்டு வியர்த்துநிற்றல்

1068.

துடித்த வான் துவர் இதழ்த் தொண்டை. தூ நிலாக்
கடித்த வாள் எயிறுகள் அதுக்கி. கண்களால்
வடித்த வெங் குருதி வேல் விழிக்கும் மாதர் மெய்
பொடித்த வேர். புறத்து உகு நறவம் போன்றவே!
 
துடித்த வான் துவர் இதழ்த் தொண்டை- துடிக்கின்ற மிகச் சிவந்த
வாய்  இதழ்களாகிய  கொவ்வைக்  கனியை;  தூநிலாக்  கடித்த வாள்
எயிறுகள்   அதுக்கி   -  வெண்ணிற  நிலாவினைக்  துண்டு  செய்து
வைத்துள்ளது  போன்ற  ஒளிபொருந்திய  பற்களாற்  கடித்து; வெடித்த
வெங்குருதி  வேல்  கண்களால் விழிக்கும்  - கூர்மை செய்யப்பட்டு
(பகைவரின்)   கொடுங்குருதி  தோயப்பெற்ற   வேல்களைப்   போன்று.
மதுவால்  சிவந்து  போனதன்  கண்களால்  பார்க்கின்ற; மாதர்  மெய்
உகும் பொடித்த வேர் - ஒருத்தியின் உடம்பில் சிந்தும் வியர்வை நீர்;
புறத்து  உகு  நறவம்  போன்றது -  உடலுட்  சென்ற மது வெளியே
சிந்துவது போன்றிருந்தது.

உள்ளே     சென்ற  மதுவே  பெண்தன்மைக்கு மாறான இத்தகைய
மெய்ப்பாடுகளைத் தோற்றுவித்தவாறு  வெளியே  சிந்தியது.  குடித்தகள்
உள்ளே   நிரம்பி   அங்கு  இடமின்மையால்.   மயிர்க்கால்   தோறும்
வெளியே  கசிவது  போல.  உடல்  வெயர்த்தது   என்பதாம்.  உள்ளே
இடமில்லாது  போனாலும்.  ஊற்றிக்  கொண்டே   இருப்பதால்.   நுண்
துளை வழியாக உட்சென்றது வெளியே புறப்பட்டது எனினுமாம்.     22