மிதிலைக் காட்சிப் படலம் - 610

அமளி நண்ணிய ஆரணங்கின் நிலை (610-613)

610.

நாள் அறா நறு மலர் அமளி நண்ணினாள்-
பூளை வீ புரை பனிப் புயற்குத் தேம்பிய
தாள தாமரைமலர் ததைந்த பொய்கையும்.
வாள் அரா நுங்கிய மதியும். போலவே.
 
பூளைவீ    புரை- பூளைப் பூவைப் போன்ற; பனிப்  புயற்கு -
(மெல்லிய வெண்ணிறமான)  பனிமழைக்கு; தேம்பிய  தாள தாமரை
மலர் - தாள்களைக்  கொண்ட  வாடிய தாமரைப் பூக்கள்; ததைந்த
பொய்கையும்  -  நெருங்கின  தடாகத்தையும்; வாள் அரா - வாள்
போல்   கொடிய   பாம்பினால்;   நுங்கிய   மதியும்   போல -
விழுங்கப்பட்ட சந்திரனையும்   ஒப்ப   (அந்த   மலர்ப்   படுக்கை)
வாட்டத்தை அடையுமாறு;  நாள்  அறா  நறுமலர் - அன்று பூத்த
நறுமலர்களைக் கொண்டு  பரப்பப்பட்ட;  அமளி  நண்ணினாள் -
அப்படுக்கையில் (சீதை) சேர்ந்தாள்.   

தோழியர்  அமைத்த    மலர்ப்படுக்கையில்    சீதை    சேரவும்
அப்படுக்கை அவளது மேனி வெப்பத்தால் தீய்ந்துவிட்டது.        47