எழுச்சிப் படலம் - 843

சேனை கங்கை யாற்றை ஒத்தது எனல்

தானையின் செலவுக்காட்சி
 
843.    

அம் கண் ஞாலத்து அரசு மிடைந்து. அவர்
பொங்கு வெண்குடை சாமரை போர்த்தலால்.
கங்கை யாறு கடுத்தது - கார் எனச்
சங்கு. பேரி. முழங்கிய தானையே.
 
சங்கு   பேரி- சங்குகளும் பேரிகைகளும்; கார் என முழங்கிய -
மேகம்  முழங்குவது  போல  முழங்கிய; தானை   - அச்சேனையானது;
பொங்கு  வெண்குடை - விளங்கும் வெண்ணிறக் குடைகளும்; சாமரை
-  வெண்சாமரங்களும்;  போர்த்தலால்  - நிரம்பியிருப்பதால்; கங்கை
ஆறு  -  கங்கா  நதியை;  கடுத்தது  -  ஒத்தது; அம்கண் - அழகிய
இடமுள்ள; ஞாலத்து அரசு - நிலவுலகில் அரச சின்னங்கள்; மிடைந்த
- நெருங்கின.

சங்கும்     பேரிகைகளும்  முழங்குகின்ற    அந்தச்    சேனையில்
வெண்குடைகளும்     வெண்சாமரங்களும்     நெருங்கி      எங்கும்
வெண்ணிறத்தோடு   காட்சியளித்தமையால்  அச்சேனை    கங்கையாறு
போலத் தோன்றிற்று என்பது.                                 27