எழுச்சிப் படலம் - 840

வண்டிகள் செல்லுதல்

வண்டியில் வயங்கிய மகளிர்
 
840.    

கண்டவர் மனங்கள் கைகோப்பக் காதலின்.
வண்டு இமிர் கோதையர் வதன ராசியால்.
பண் திகழ் பண்டிகள் பரிசின் செல்வன.
புண்டரிகத் தடம் போவ போன்றவே.
 
கண்டவர்     மனங்கள்- (தம்மைப்) பார்த்த   ஆடவரின் மனம்;
காதலின் கைகோப்ப - காதலால் கலக்க; பண்திகழ் பரிசின் -  பூட்டு
விளங்குகின்ற  தன்மையோடு;  செல்வன - செல்லுகின்ற; பண்டிகள் -
வண்டிகள்;   வண்டு  இமிர்  கோதையர்  - வண்டுகள்  ஒலிக்கின்ற
கூந்தலையுடைய    மகளிரின்;   வதன   ராசியால்   -  முகங்களது
கூட்டத்தால்; புண்டரீகம் தடம் போவ - தாமரை மலர்ந்த தடாகங்கள்
செல்வதை; போன்ற - ஒத்தன.

வண்டியில்   செல்லும் மகளிரின் முகங்கள் பூத்த தாமரைகள் போல்
விளங்கின.  அதனால்  வண்டி செல்வது தாமரைத்  தடாகமே  போவது
போன்றது என்றார். தற்குறிப்பேற்ற அணி.                       24