எழுச்சிப் படலம் - 835

யானைப்படையின் மிகுதி

யானை குதிரைகளின் செலவு
 
835.    

மொய் திரைக் கடல் என முழங்கு மூக்குடைக்
கைகளின். திசை நிலைக் களிற்றை ஆய்வன. -
மையல் உற்று. இழி மத மழை அறாமையால்.
தொய்யலைக் கடந்தில. சூழி யானையே.
 
சூழியானை  - முகபடாத்தை அணிந்த யானைகள்; இழி மதமழை-
ஒழுகுகின்ற மதப்பெருக்கு; அருமையால் - எப்பொழுதும்  நீங்காததால்;
தொய்யலை  -  (மதநீரால்  தோன்றிய)  சேற்றை; கடந்தில - கடந்து
கரையேற  மாட்டாது; மையல்  உற்று  - மயக்கமுற்று; மொய்திரைக்
கடலென  -  நெருங்கிய  அலைகளையுடைய  கடல்போல; முழங்கும்
மூக்குஉடை   -  முழங்கும்  மூக்கோடு  கூடிய;  கைகளின்  - (தம்)
கைகளினாலே;  திசை நிலைக் களிற்றை - எட்டுத்திக்கு யானைகளை;
ஆய்வன - துழாவி ஆராய்கின்றன.

(வி.ரை)   யானைகள் சேற்றில் விழுந்து கரையேற மாட்டாமல் கடல்
போல  ஒலித்துக் கைகளால்  திசையானைகளைத்    துழாவித்  தேடின
என்பது.  தன்மைத் தற்குறிப்பேற்ற அணி. தொய்யல் - சேறு   நிரம்பிய
பள்ளம்.                                                  19