பூக் கொய் படலம் - 1013

அனைவரும் புனலாட்டுக்குச் செல்லுதல்

புனலாடப் புறப்படல்.
 
1013.

ஏயும் தன்மையர் இவ் வகையார் எலாம்.
தூய தண் நிழல் சோலை. துறு மலர்
வேயும் செய்கை வெறுத்தனர்; வெண் திரை
பாயும் தீம் புனல் - பண்ணை சென்று எய்தினார்.
 
ஏயும்   தன்மையர் - (இதுகாறும் கூறியவாறு பூக்கொய்தலும் புலவி
கொள்ளுதலும்  முதலிய)  செய்கைகளை  மேற்கொண்டவர்களான; இவ்
வகையார்  எலாம்  -  இத்தகைய ஆடவரும் பெண்டிரும்; தூய தண்
நிழல்   சோலை   -   தூய்மையுடைய  குளிர்ந்த  நிழலைத்   தரும்
அச்சோலையிலே;   துறுமலர் வேயும்   செய்கை   வெறுத்தனர்  -
நெருங்கிய    மலர்களைப்   (பறித்துச்)    சூடுகின்ற    செயலின்மேல்
விருப்பமில்லாதவர் ஆயினர்; வெண்திரை பாயும் தீம்புனல் பண்ணை
- வெள்ளை அலைகள் பாயும்  இனிய  நீரில் விளையாடுவதில்; சென்று
எய்தினார் - (மனம்) சென்றதனால் (நீர்நிலைகளை) அடைந்தார்கள். 

துறுமலர்     - வினைத்தொகை.   புனல்பண்ணை: நீர்விளையாட்டு.
பழகப்  பழகப்  பாலும்  புளிக்கும்  ஆதலின்  மலர்வேயும் செய்கையும்
வெறுத்தனர்  என்றார். செயல்மாற்றம் சோர்வு  மாற்றும்  ஆதலின் பூக்
கொய்தோர்  இனிப் புனல் விளையாடப்  போகின்றனர்  என  அடுத்தப்
படலத்துக்குத் தோற்றுவாய் அமைத்தார்.                        39