எழுச்சிப் படலம் - 856

குதிரை ஒருபெண்ணைத் தூக்கிச் செல்லுதல்

மாது ஒருத்தியைக் கொண்டு ஓடும் குதிரைத் தோற்றம்
 
856.    

‘இம்பர் நாட்டின் தரம் அல்லள். ஈங்கு இவள்;
உம்பர் கோமகற்கு’ என்கின்றது ஒக்குமால் -
கம்ப மா வர. கால்கள் வளைத்து ஒரு
கொம்பு அனாளைக் கொண்டு ஓடும் குதிரையே!
 
கம்ப மா வர- யானை தொடர்ந்து வர; ஒரு கொம்பு அனாளை -
பூங்கொம்பு  போன்ற  ஒருத்தியை;  கொண்டு  -  சுமந்து   கொண்டு;
கால்கள் வளைத்து - முன்னங் கால்களை வளைத்து; ஓடும் குதிரை -
ஓடுகின்ற   குதிரையானது;  ஈங்கு   இம்பர்   நாட்டின்  -  இங்கே
இவ்வுலகத்திலே  (வாழ்வதற்கு); தரம் அல்லள் - ஏற்றவளாக  இல்லை;
இவள் - இந்தப் பெண்; உம்பர் கோமகற்கு - தேவர்கள் தலைவனான
இந்திரனுக்கு  (உரியவள்);  என்கின்றது - என்று கூறுவதை; ஒக்கும் -
ஒத்திருக்கும்.

ஒரு     குதிரை  ஒரு  பெண்ணையேற்றிக்    கொண்டு    தாவிச்
செல்லும்போது வானத்தில் செல்வதுபோல் உள்ளது. அது   தேவர்களின்
தலைவனான   இந்திரனுக்கு    உரியவள்   இவள்  என்று  அவனிடம்
அவளைக்    கொண்டு     செல்வது   போன்றுள்ளது   என்றார்   -
தற்குறிப்பேற்ற அணி. கம்ப மா - யானை.                       40