கடிமணப் படலம் - 1281

1281.    

விடம் நிகர் விழியாரும்.
   அமுது எனும் மொழியாரும்.
கிடை புரை இதழாரும்.
   கிளர் நகை வெளியாரும்.
தட முலை பெரியாரும்.
   தனி இடை சிறியாரும்.
பெடை அன நடையாரும்.
   பிடி என வருவாரும்.-
 
விடநிகர்   விழியாரும்-   (விரும்பாதார்க்கு)   நஞ்சினையொத்த
கண்ணினரும்;   அமுது  எனும்  மொழியாரும்  -  (விரும்புவார்க்கு)
அமுதினை  யொத்த  மொழியினரும்; கிடைபுரை இதழாரும் - சிவந்த
நெட்டியை யொத்த உதட்டினை யுடையாரும்; கிளர்நகை  வெளியாரும்
-   விளங்கும்   பற்களோ  வெண்ணிறமாக  உடையாரும்;  தடமுலை
பெரியாரும்  -  அகன்ற  தனங்களின்  பெருமை   கொண்டவர்களும்;
தனிஇடை   சிறியாரும்   -   தனித்தன்மை   வாய்ந்த    மிகச்சிறிய
இடையினை  உடையவர்களும்;  பெடை  அன நடையாரும் -  பெண்
அன்னத்தின்  நடையினை  யுடையவர்களும்; பிடி என  வருவாரும் -
பெண்யானையைப்  போல  நடந்து  வருபவர்களும்   (ஆகிய பெண்டிர்
எங்கும்) (ஆயினர்).  

ஒவ்வோர்     அடியிலும் முரண்  தொடையிட்டுப்  பெண்மையினை
வர்ணித்துள்ள  திறம் ஓர்க. விடம் என அவர்களை  வெறுத்து  விடற்கு
இல்லை;   அருகிலேயே  அமுதனைய  மொழியும்  உண்டு   என்பார்.
“விடநிகர் விழியாரும். அமுதெனும் மொழியாரும்” என்றார்.        37