எழுச்சிப் படலம் - 849

849.    

சுழியும் குஞ்சிமிசைச் சுரும்பு ஆர்த்திட.
பொழியும் மா மத யானையின் போகின்றான்.
கழிய கூரிய என்று ஒரு காரிகை
விழியை நோக்கி. தன் வேலையும் நோக்கினான்.
 
சுழியும்     குஞ்சிமிசை- சுருண்டுள்ள (தன்) தலைமயிர்   மேல்;
சுரும்பு - வண்டுகள்; ஆர்த்திட- ஆரவாரிக்க; மாமதம் பொழியும் -
மிக்க  மதநீரைப்  பொழிகின்ற;  யானையின்  -  யானையைப்  போல;
போகின்றான் -  செல்கின்ற  ஒருவன்;  ஒரு காரிகை விழியை- ஒரு
பெண்ணின்    விழிகளை;   கழிய   கூரிய   என்று   நோக்கி  -
மிகக்கூர்மையானவை  என்று பார்த்து; தன் வேலையும் - (கண் போல
இவ்வேற்படை   கூர்மையானதா   என்று)   தன்  வேற்படையையும்;
நோக்கினான் - பார்த்தான்.

வீரன்   கையில் பிடிக்கும் வேலைக் காட்டிலும் அந்தப்  பெண்ணின்
கண்கள்   மிகக்  கூர்மையானவை   என்பது.   சுழிதல்:   சுழிசுழியாகச்
சுருண்டிருத்தல்.    உயிரின்   பாய்ந்து    துளைக்கும்    இயல்புடைய
கண்களைவிட உடலில் மாத்திரம்  பாய்ந்து  துளைத்துச் செல்லும் வேல்
இழிந்தது என்று அவ்வீரன் கருதினான்.                         33